من تقرير يومي اكسل بإيدك لداش بورد اكسل بيتحدث لوحده

لو كل يوم الصبح بتفتح كذا ملف، وبتنسخ أرقام امبارح، وبتعمل منها تقرير يومي اكسل وتبعته لمديرك، فالمقال ده ليك. هشرح إزاي نفس التقرير يتحول لداش بورد اكسل بيتحدث لوحده كل يوم، من غير ما تكتب code.

تقرير يومي اكسل بإيدك: بياخد وقتك في إيه؟

لو كتبت خطوات التقرير اللي بتعمله كل يوم، غالبًا هتلاقيها كده:

• تجمع الأرقام من أكتر من مكان: إيميلات، رسايل واتساب، شيتات الزملاء.
• تنسخها في شيت واحد وتظبط التواريخ والأسماء.
• تحسب الإجماليات وتقارنها بامبارح أو بالـ target.
• تعمل chart وتبعت التقرير.

كل خطوة فيهم بسيطة. المشكلة إنها بتتكرر كل يوم، وأي رقم يتنسخ غلط بيظهر في التقرير قدام المدير.

أنا كان عندي تقرير يومي زي ده بياخد مني ساعتين كل يوم، لحد ما عملت له automation وبقى أقل من 5 دقايق. وقتها عملته بـ Python، والقصة كاملة في 7 مشاريع بايثون للـ automation. النهاردة نفس الفكرة تتعمل من غير code.

المثال اللي هنمشي عليه

شركة عندها 4 فروع. كل مدير فرع بيبعت آخر اليوم على واتساب عدد الطلبات وقيمة المبيعات وأي ملاحظات. وكل يوم الصبح حد في الإدارة بينقل الأرقام دي في شيت، ويعمل منها تقرير المبيعات اليومي للمدير.

نفس الخطوات تنفع لأي تقرير بيتعمل كل يوم من أرقام بتيجي من أكتر من حد: تقرير QC، أو تقرير مواقع شغل، أو تقرير خدمة عملاء.

الفكرة كلها 3 أجزاء

1. شيت الداتا: مكان واحد بتنزل فيه الأرقام كل يوم، كل إدخال في row.
2. الداش بورد: صفحة فيها الأرقام المهمة والـ charts، بتتعمل مرة واحدة، وبتقرا من شيت الداتا.
3. الـ flow: خطوات على n8n بتشتغل لوحدها كل يوم في ميعاد ثابت، بتقرا أرقام امبارح وتبعت التقرير.

n8n أداة automation بترص فيها خطوات جاهزة ورا بعض. كل خطوة اسمها node وبتعمل حاجة واحدة: تقرا شيت، تحسب إجمالي، تبعت إيميل. بتختار الـ node من قايمة وتملا الخانات بتاعتها.

الجزء الأول والتاني بتعملهم مرة واحدة. الجزء التالت هو اللي بيخلّي التقرير يوصل كل يوم من غيرك.

الخطوة 1: شيت داتا واحد بدل ملفات كتير

اعمل شيت اسمه Data، وحط فيه الأعمدة دي، وحوّله لـ Table من Ctrl+T واديله اسم Data:

Date	Branch	Orders	Sales	Notes
2026-10-19	المعادي	38	41,500
2026-10-19	مدينة نصر	52	63,200	نقص في مقاس L

سميت الأعمدة بالإنجليزي علشان الـ formulas تبقى أسهل في القراية. كل فرع في كل يوم ليه row لوحده. مفيش merged cells، ومفيش إجماليات في نص الجدول، والتاريخ يبقى تاريخ بجد مش نص.

بعد كده الأرقام لازم تنزل في الشيت ده من غير ما حد ينقلها. أسهل طريقة فورم فيه 4 خانات: الفرع، وعدد الطلبات، وقيمة المبيعات، والملاحظات. تقدر تعمله بـ Microsoft Forms أو بالـ Form اللي جوه n8n نفسه. كل مدير فرع يفتح اللينك من موبايله ويملاه، وكل مرة بيتبعت الفورم بينزل row جديد في الشيت.

الفورم ده بيلغي أكبر سبب للغلط في التقرير: إنك تنقل رقم من رسالة لشيت بإيدك.

حاجة مهمة: الملف لازم يكون على OneDrive أو SharePoint، أو يكون Google Sheets. ملف محفوظ على الـ desktop عندك محدش يقدر يكتب فيه وانت قافل الجهاز.

الخطوة 2: الداش بورد اكسل بيتعمل مرة واحدة

اعمل شيت تاني اسمه Dashboard. حط فوق 3 أرقام لامبارح: إجمالي المبيعات، وعدد الطلبات، وعدد الفروع اللي بعتت. تحتهم جدول صغير لكل فرع في آخر 7 أيام، وline chart للمبيعات يوم بيوم.

الأرقام دي formulas بتقرا من الـ Table على طول:

=SUMIFS(Data[Sales], Data[Date], TODAY()-1)
=SUMIFS(Data[Orders], Data[Date], TODAY()-1)
=COUNTIFS(Data[Date], TODAY()-1)

الـ Table بتكبر لوحدها مع كل row جديد، والـ formulas والـ charts المربوطة بيها بتتحدث معاها. ده السر في إن الداش بورد اكسل يتحدث لوحده: مفيش copy paste، ومفيش range بتعدله كل أسبوع.

ممكن تستخدم Pivot Table بدل الـ formulas، بس الـ Pivot محتاج Refresh علشان يقرا الأرقام الجديدة. الـ formulas هنا أريح.

ولو عايز تعرف بنظرة مين ما بعتش، اعمل في الجدول عمود لكل فرع بالـ formula دي، ولوّن الخلية أحمر بالـ Conditional Formatting لما النتيجة تبقى 0:

=COUNTIFS(Data[Branch], A5, Data[Date], TODAY()-1)

الخطوة 3: flow على n8n بيبعت التقرير كل يوم الصبح

الـ flow فيه 4 nodes ورا بعض:

1. Schedule Trigger: بيشغّل الـ flow كل يوم الساعة 8 الصبح.
2. Microsoft Excel 365 (أو Google Sheets لو الشيت هناك): بيقرا الـ rows من شيت Data.
3. Filter وبعده Summarize: الـ Filter بيسيب rows امبارح بس، والـ Summarize بيحسب الإجمالي لكل فرع.
4. Send Email من Outlook أو Gmail: بيبعت للمدير الأرقام في سطرين ولينك الداش بورد.

الحاجة الوحيدة اللي شبه code هي تاريخ امبارح في الـ Filter، وده سطر واحد بتنسخه:

{{ $today.minus({ days: 1 }).toFormat('yyyy-MM-dd') }}

ولو عايز تزود خطوة: node بيشوف مين ما بعتش لحد الساعة 10 ويبعتله رسالة تفكير. بس ابدأ بالـ 4 nodes الأول، وزود بعد ما الأساس يشتغل كام يوم من غير مشاكل.

الإيميل نفسه يبقى قصير، يتقري في 10 ثواني:

مبيعات امبارح 19 أكتوبر: 4 فروع بعتت من 4.
إجمالي المبيعات 187,300 من 171 طلب.
ملاحظات: مدينة نصر نقص في مقاس L.
الداش بورد كامل: [اللينك]

المدير مش محتاج يفتح الملف علشان يعرف الأهم. ولو عايز التفاصيل، اللينك بيوديه على الداش بورد اكسل وفيه كل فرع والـ chart بتاع الأسبوع.

النتيجة إن المدير بيفتح الإيميل الساعة 8 يلاقي التقرير، وانت بتبدأ يومك في شغلك الأساسي.

نفس الشيت بيطلع تقرير أسبوعي وشهري

لما الداتا كلها بقت في Table واحدة، التقرير الأسبوعي مبقاش شغل جديد. نفس الـ formula بتتغير فيها المدة بس:

=SUMIFS(Data[Sales], Data[Date], ">="&TODAY()-7, Data[Date], "<"&TODAY())

دي بتجمع المبيعات في آخر 7 أيام. وللشهري تخلّي الشرط من أول الشهر بـ EOMONTH. وفي n8n تعمل flow تاني بـ Schedule Trigger كل يوم أحد أو أول كل شهر، بنفس الـ nodes.

ده الفرق الحقيقي بين تقرير بتعمله بإيدك وداتا متنظمة: كل تقرير جديد بيبقى formula أو flow صغير، مش ساعة زيادة في يومك.

4 حاجات بتبوظ التقرير اليومي

1. التاريخ متكتب كنص: لو حد كتب 19/10 كنص، الـ SUMIFS مش هيلاقيه والرقم هيطلع ناقص. الفورم بيحل ده لأنه بيبعت تاريخ حقيقي.
2. اسم عمود اتغيّر: الـ flow بيدوّر على اسم العمود بالظبط. لو حد غيّر Sales لـ Total Sales، الـ flow هيقف. ثبّت أسماء الأعمدة ومتغيرهاش.
3. اسم الفرع مكتوب بأكتر من شكل: "المعادي" و"فرع المعادي" عند الـ formula فرعين مختلفين. خلّي الفرع في الفورم قايمة تختار منها، مش خانة تكتب فيها.
4. الـ flow وقف ومحدش خد باله: في إعدادات الـ workflow في n8n فيه Error Workflow. اربطه بـ flow صغير يبعتلك إيميل لو أي حاجة وقفت، علشان تعرف قبل ما المدير يسأل.

مش جاهز لـ n8n؟ ابدأ بالداش بورد

لو لسه مش جاهز للـ flow، اعمل الخطوة 1 و2 النهاردة: الـ Table والفورم والداش بورد. ده لوحده هيوفر عليك النسخ والحساب كل يوم، والتقرير هيبقى جاهز أول ما تفتح الملف. وبعد كده الـ flow يكمّل الباقي ويبعته من غيرك.

تتعلم تبني الـ flow ده فين؟

في دبلومة AI Automation بنبني flows زي دي خطوة بخطوة على حالات من شغل الدارسين نفسهم. المحاضرة 3 فيها أساسيات n8n وإزاي الـ flow يشتغل في ميعاد، والمحاضرة 6 فيها الشغل على الشيتات، والمحاضرة 23 فيها داش بورد لايف.