شروط الخدمات

النطاق مكتوب قبل ما نبدأ

بعد المكالمة الأولى بيوصلك عرض مكتوب فيه النطاق والمدة والسعر وإيه اللي هتستلمه بالظبط. الشغل بيبدأ لما توافق على العرض، وهو المرجع لو حصل أي خلاف.

أسعار الخدمات على الموقع بتبدأ من الرقم المكتوب. السعر النهائي هو اللي في العرض.

الدفع

• المشاريع اللي سعرها أقل من 25,000 ج.م بتتدفع مقدماً بالكامل.
• المشاريع الأكبر: 50% مع بداية الشغل، و 50% عند التسليم.
• الجلسات والمتابعة الشهرية والرعاية الشهرية بتتدفع مقدماً.
• بالجنيه لو بتدفع من مصر، وبالدولار لو بتدفع من خارج مصر. مفيش تقسيط.

طلبات التعديل

أي حاجة برّه العرض المكتوب تعتبر طلب تعديل: workflow زيادة، أداة جديدة تتربط، أو تغيير في طريقة شغل حاجة اتسلّمت واتوافق عليها. بقولك تكلفتها ومدتها قبل ما أبدأ، ومش بتتنفّذ من غير موافقتك.

تصليح حاجة مش شغّالة زي ما العرض بيقول مش طلب تعديل، وده عليّا.

الملكية

كل حاجة بتتبني على حساباتك انت: n8n والأدوات والـ APIs. بتستلم الـ workflows والملفات والصلاحيات كاملة، وهي ملكك بعد ما الدفع يكمل.

الدعم بعد التسليم

كل خدمة ليها فترة دعم مكتوبة في صفحتها وفي العرض، مثلاً 30 يوم للأوتوميشن السريع و 60 يوم للنظام المتكامل. خلالها بصلّح أي عطل في اللي اتبنى من غير تكلفة.

بعد فترة الدعم، الرعاية الشهرية اختيارية، أو كل طلب بيتسعّر لوحده.

n8n وترخيصه

n8n بيشتغل على سيرفرك انت أو حسابك انت، ولاستخدام شغلك. أنا بقدّم التركيب والرعاية كخدمة، وده مسموح في ترخيص n8n. حساب السيرفر ودفعه بيبقوا باسمك.

لو عايز تدّي عملاء صلاحية يبنوا workflows على السيرفر بتاعك مقابل فلوس، ده محتاج ترخيص تجاري من n8n.

السرية

البيانات والمعلومات اللي بتوصلني عن شغلك بستخدمها للشغل ده بس، ومش بشاركها مع حد. لو محتاج اتفاقية سرية مكتوبة، ابعتها قبل ما نبدأ.

مش بعرض شغلك في صفحة المشاريع غير بموافقتك، ومن غير اسمك أو بياناتك لو طلبت كده.

حدود المسؤولية

مسؤوليتي في أي حالة مش هتزيد عن المبلغ اللي دفعته في الخدمة دي.

الأوتوميشن بيعتمد على أدوات ومزوّدين تانيين. لو واحد منهم وقف أو غيّر خدمته، ده مش مسؤوليتي، بس هساعدك تتعامل معاه.

القانون المطبق

الشروط دي بتخضع لقوانين جمهورية مصر العربية.