أنا م. محمد عبدالجواد

أول حاجة عملتلها أوتوميشن كانت شغلي أنا. في 2021 كان عندي تقرير سعة يومي بياخد ساعتين كل يوم: أسحب أرقام من أكتر من نظام، أرتّبها، أرسم شوية شارتات، وأبعتها. كتبت أداة بتعمل ده لوحدها، وبقى التقرير بيطلع في أقل من 5 دقايق بأكتر من 50 شارت ويوصل على الإيميل. الساعتين دول رجعولي، وفهمت إن أغلب الشغل المتكرر في أي شركة ممكن يتشال بنفس الطريقة.

من وقتها وأنا شغّال في ده. اتنقلت لفريق الأوتوميشن في نفس الشركة، وسلّمت أكتر من 50 مشروع أوتوميشن، منهم robot بيقفل حوالي ثلث طلبات الدعم لفريق IT كامل من غير ما حد يلمسه، مراجعة صلاحيات ربع سنوية بتمشي لوحدها على أكتر من 2000 سيرفر، بوابة LLM بتدّي كل تطبيق مفتاح وسقف صرف، ومكالمات تنبيه للمهندس المناوب على Microsoft Teams من غير تكلفة لكل مكالمة. من مارس 2025 أنا Tech Lead في فريق الأوتوميشن، بصمّم الأنظمة وبراجع شغل 8 مهندسين.

في 2024 فزت بهاكاثون على مستوى مصر ووصلت لنصف نهائي أفريقيا بتطبيق ويب بيعمل أوتوميشن لإعدادات الأمان والتحقق منها في بيئة zero-trust. وفي شغلي ومع كل دفعة بدرّس حاجة واحدة: الـ AI لوحده مش نظام. النظام هو الحدود اللي حواليه، والمراجعة البشرية، والتكلفة اللي محسوبة قبل ما يشتغل.

درّبت أكتر من 70 دارس من مصر والسعودية، وبحاضر في دفعة AI Automation الحالية في مبادرة رواد مصر الرقمية (DEPI). اللي شفته في كل دفعة إن الناس مش ناقصها ذكاء ولا كورسات، ناقصها حد يقعد معاها على نفس الأدوات اللي بتشتغل بيها الشركات لحد ما أول workflow يشتغل. عشان كده الدبلومة 25 محاضرة لايف، في 24 منهم lab، وأنا اللي بدرّسها بنفسي من أول محاضرة لآخر واحدة.

ساكن في الإسكندرية. بحب أفكّك الحاجات عشان أفهم بتشتغل إزاي، وده اللي بعمله مع كل أداة جديدة قبل ما أدرّسها. لو عندك سؤال، ابعتلي على واتساب، بحب أرد بنفسي.