هل n8n مجاني؟ أيوه ولأ، حسب إنت هتشغّله فين. n8n له نسخة اسمها Community تنزّلها وتشغّلها على سيرفرك من غير ما تدفع لـ n8n ولا مليم، ومن غير حد للـ workflows أو الـ executions. وفيه n8n Cloud، النسخة اللي n8n بتستضيفها لك، ودي اشتراك شهري باليورو بعد تجربة مجانية 14 يوم. الفرق بين الاتنين في مين بيدفع تمن السيرفر، ومين بيصلّح لما حاجة تقع، وإيه اللي بيحصل لما الـ executions تخلص في نص الشهر.
في المقال ده هشرح الاتنين بالأرقام الحالية، إيه اللي الترخيص بيسمح بيه وإيه اللي ممنوع، والتكاليف اللي بتظهر بعد أول شهر، وحسبة سنة كاملة تقارن بيها.
المحتوى
- هل n8n مجاني فعلاً؟ نسخة Community
- الترخيص: تعمل إيه وماتعملش إيه
- اسعار اشتراك n8n Cloud في سبتمبر 2026
- لما الـ executions تخلص
- التكاليف المخفية
- حسبة سنة كاملة
- جدول القرار
- فريلانسر، شركة صغيرة، شركة كبيرة
- أسئلة شائعة
هل n8n مجاني فعلاً؟ نسخة Community
نسخة Community هي n8n اللي بيشتغل على سيرفرك من غير أي license key. توثيق n8n بيوصفها إنها فيها تقريباً كل المميزات. كل الـ nodes موجودة، الـ AI Agent موجود، الـ webhooks والـ Code node والـ HTTP Request شغالين، ومفيش عداد executions.
اللي مش موجود فيها حاجات بتفرق مع الفرق الكبيرة: الـ SSO، الـ Projects، مشاركة الـ workflows والـ credentials بين المستخدمين، الـ Environments، الـ version control بـ Git، والـ external secrets. في Community كل workflow بيشوفه صاحبه بس.
فيه كمان Registered Community: نفس النسخة المجانية، بس تسجّل إيميلك من Settings > Usage and plan وتدوس Unlock، فيوصلك license key مجاني يفتح الـ folders و debug in editor وحفظ بيانات مخصّصة للـ executions. لسه مجانية.
الترخيص: تعمل إيه وماتعملش إيه
n8n مش open source بالمعنى التقليدي. ترخيصه اسمه Sustainable Use License، والجملة اللي تحفظها من صفحة الأسئلة بتاعته: لو الـ workflows بتتعمل أو بتتعدّل بإيدك أو بإيد ناس في شركتك، تقدر تستخدم n8n ببلاش.
المسموح:
- تستخدمه في شغل شركتك، أو لمشاريعك الشخصية والتعلّم.
- تبني workflows لعملائك على الـ instance بتاعتك، طالما العميل مش بيعدّل أو يبني حاجة.
- تاخد فلوس على بناء الـ workflows وتركيبها وصيانتها، وعلى التدريب والاستشارات.
- تركّب n8n على سيرفر العميل نفسه وتديره وتاخد أجرك، بشرط إنك ماتكونش إنت اللي مستضيفه.
الممنوع:
- تستضيف n8n كخدمة وتخلّي عملاءك يبنوا workflows عليها.
- تعمل منتج فيه builder بيخلّي المستخدم يرسم الأوتوميشن و n8n شغال من ورا.
- تشيل اسم n8n وتبيعه على إنه منتجك.
يعني الفريلانسر اللي بيبني لعملائه وياخد أجر التنفيذ شغال في المسموح. واللي عايز يعمل "منصة أوتوميشن" بيبيع فيها اشتراكات لازم يكلّم n8n على ترخيص تجاري.
اسعار اشتراك n8n Cloud في سبتمبر 2026
n8n Cloud بيبدأ بتجربة مجانية 14 يوم من غير كارت، فيها 1,000 execution و 5 executions في نفس الوقت. في آخر التجربة الـ workspace بيتمسح، وقدامك 90 يوم تنزّل الـ workflows بتاعتك. الأسعار باليورو، من صفحة الأسعار في سبتمبر 2026:
| الباقة | لو دفعت سنوي | لو دفعت شهري | executions في الشهر | في نفس الوقت |
|---|---|---|---|---|
| Starter | 20 يورو / شهر | 24 يورو | 2,500 | 5 |
| Pro | 50 يورو / شهر | 60 يورو | 10,000 | 20 |
| Pro (الدرجة الأعلى) | حوالي 121 يورو / شهر | 145 يورو | 50,000 | 50 |
| Business (على سيرفرك بس) | 667 يورو / شهر | 800 يورو | 40,000 | |
| Enterprise | بالتواصل مع المبيعات | حسب الاتفاق | 200+ |
كل الباقات فيها عدد مستخدمين وعدد workflows مفتوح. بالجنيه، على حوالي 59 ج.م لليورو: Starter بين 1,180 و 1,420 ج.م في الشهر، و Pro بين 2,950 و 3,540 ج.م. والأسعار بتتغيّر، فافتح الصفحة قبل ما تدفع.
يعني إيه execution؟
الـ execution هو تشغيل واحد للـ workflow من أوله لآخره، مهما كان فيه nodes. workflow فيه 15 node واشتغل مرة يتحسب execution واحد. التشغيل اليدوي من الـ editor والـ sub-workflows مش بيتحسبوا.
الحسبة بسيطة. workflow بيشتغل كل يوم الصبح بـ Schedule Trigger هيستهلك حوالي 30 execution في الشهر. نفس الـ trigger كل 5 دقايق هيستهلك حوالي 8,600، وده لوحده أكتر من باقة Starter كلها. الـ polling triggers (زي Google Drive Trigger) بتتحسب بس لما تلاقي حاجة جديدة. والشات بوت: كل رسالة من العميل بتشغّل الـ workflow من الأول، فـ 1000 محادثة فيها 4 رسايل = 4,000 execution.
لما الـ executions تخلص
دي أهم حاجة محدش بيقولها. على Starter و Pro، لما حصة الشهر تخلص، أي execution جديد بيفشل فوراً برسالة "Execution limit reached". الـ triggers بتفضل تشتغل، بس كل تشغيلة بتقع، ومفيش حاجة بتستنى وتتنفذ بعدين. الحصة بتتجدد أول كل شهر ميلادي، مهما كان ميعاد الدفع.
يعني لو عندك شات بوت على Starter وجالك ضغط في نص الشهر، البوت هيسكت لحد أول الشهر اللي بعده أو لحد ما ترقّي الباقة. الاستمرار مع حساب زيادة على كل execution موجود في Business و Enterprise بس. لو الـ workflow بتاعك بيرد على عملاء، احسب الـ executions قبل ما تختار الباقة، مش بعد ما البوت يقف.
التكاليف المخفية
"مجاني" في Community معناها إن n8n مش هياخد منك فلوس. الفلوس بتروح لحاجات تانية:
السيرفر. على DigitalOcean مثلاً، سيرفر 1 GB بـ 6$ في الشهر و 2 GB بـ 12$ (سبتمبر 2026). أنا بفضّل 2 GB على الأقل لما يكون فيه أكتر من workflow ومعاهم قاعدة بيانات Postgres. 12$ حوالي 620 ج.م.
وقتك. توثيق n8n بيقول إن الـ self-hosting للناس اللي عندها خبرة، وإن الغلط ممكن يوصل لضياع بيانات أو ثغرة أمنية. التحديثات عليك، والنسخ الاحتياطي عليك، ولازم تحفظ مفتاح التشفير (N8N_ENCRYPTION_KEY أو ملف config في فولدر .n8n)، لأن من غيره الـ credentials مش هتترجع لو السيرفر وقع.
الـ AI. الـ AI Agent في n8n بيكلّم موديل زي Gemini أو OpenAI، وده بيتحاسب بالـ tokens عند المزوّد. على Community بتحط الـ API key بتاعك وتدفع للمزوّد مباشرة. على n8n Cloud فيه كمان Gateway credits: رصيد مدفوع مقدماً تشغّل بيه موديلات من غير حساب عند المزوّد، ولما يخلص الـ nodes اللي بتستخدمه بتقف. وده غير الـ AI credits اللي في الباقة، ودي للـ AI Assistant اللي بيساعدك تبني الـ workflows. في الحالتين الـ AI له فاتورة لوحده. للتجربة، Gemini API عنده free tier، بس جوجل بتستخدم المحتوى فيه لتحسين منتجاتها، فمتبعتلوش بيانات عملاء.
الكارت. n8n Cloud بيتدفع باليورو، ومزوّدين السيرفرات والـ AI بالدولار. كروت كتير في مصر عليها حد للمشتريات بالعملة الأجنبية، فاتأكد من بنكك قبل ما تبني حاجة لعميل على اشتراك ممكن يقف.
حسبة سنة كاملة
شركة صغيرة عندها workflows بتستهلك حوالي 3,000 execution في الشهر (يعني أكتر شوية من Starter):
| الاختيار | الحسبة | في السنة |
|---|---|---|
| Community على سيرفر 2 GB | 12 × 12$ | 144$ (حوالي 7,450 ج.م) |
| Pro سنوي | 12 × 50 يورو | 600 يورو (حوالي 35,400 ج.م) |
| Pro شهري | 12 × 60 يورو | 720 يورو (حوالي 42,500 ج.م) |
الفرق حوالي 28,000 ج.م في السنة لصالح السيرفر. بس الفرق ده مش مجاني: فيه وقت تحديثات ونسخ احتياطي ومتابعة. لو معندكش حد يعمل ده، أو لو وقفة ساعة هتضرّك أكتر من فرق السعر، n8n Cloud أريح. ولو عايز السيرفر من غير الصداع، فيه تركيب مرة واحدة (تحت).
جدول القرار
| الموقف | الأنسب | ليه |
|---|---|---|
| لسه بتتعلم n8n | تجربة n8n Cloud، وبعدها Community على جهازك أو سيرفر صغير | تبدأ في دقايق من غير تركيب |
| workflows قليلة بتشتغل مرة أو مرتين في اليوم | Starter أو Community | 2,500 execution كفاية لو مفيش حاجة كل دقيقة |
| workflow كل دقيقة، أو شات بوت عليه ضغط | Community على سيرفر | مفيش عداد executions ومفيش وقفة نص الشهر |
| بيانات حساسة ومش عايزها تخرج برا الشركة | Community على سيرفر الشركة | بيانات n8n Cloud في فرانكفورت، ألمانيا |
| فريق محتاج يشارك الـ workflows | Pro على Cloud، أو Business على سيرفرك | المشاركة مش موجودة في Community |
| معندكش حد يتابع السيرفر خالص | n8n Cloud | التحديثات والنسخ الاحتياطي على n8n |
فريلانسر، شركة صغيرة، شركة كبيرة
فريلانسر في مصر. ابدأ بالتجربة المجانية عشان تتعلم، وبعدها شغّل Community على سيرفر 2 GB. هتدفع حوالي 620 ج.م في الشهر بدل 1,180 ج.م أو أكتر، ومن غير عداد. لو هتبني لعملاء، الأحسن إن كل عميل يبقى له سيرفره باسمه، فلو افترقتوا الـ workflows بتفضل عنده.
شركة صغيرة (صيدلية في إسكندرية، مكتب عقارات في الرياض). workflow أو اتنين زي طلبات الفورم اللي بتنزل في Google Sheets، Starter بيكفي وأريح. أول ما تحتاج حاجة بتشتغل كل شوية، أو تقرّب من 2,500 execution، السيرفر الخاص بيبقى أرخص بكتير. أمثلة على workflows بتستهلك executions بشكل مختلف: شات بوت واتساب بياخد execution لكل رسالة، وقراءة الفواتير execution لكل فاتورة.
شركة كبيرة. هنا أهم من السعر إن البيانات تفضل فين ومين له صلاحية عليها. أغلب الشركات اللي عندها IT هتختار self-hosted، ولو محتاجين SSO ومشاركة وصلاحيات يبقى Business أو Enterprise.
ولو قررت السيرفر الخاص ومش عايز تدخل في Docker والدومين والـ SSL، دي خدمة n8n على سيرفرك: أختارلك السيرفر، أركّب n8n بدومين و SSL وقاعدة بيانات Postgres ونسخ احتياطي يومي، وأسلّمهولك في 2 لـ 3 أيام بـ 4,500 ج.م مرة واحدة (190$ لو بتدفع من برا مصر). السيرفر باسمك وملكك، وده اللي الترخيص بيسمح بيه.
أسئلة شائعة
هل n8n مجاني للاستخدام التجاري؟
أيوه، نسخة Community مجانية لاستخدام شركتك الداخلي، وتقدر تاخد فلوس على بناء workflows لعملاء وصيانتها. الممنوع إنك تستضيف n8n وتبيع للعملاء إنهم يبنوا عليه بنفسهم.
التجربة المجانية لـ n8n Cloud مدتها قد إيه؟
14 يوم من غير كارت، فيها 1,000 execution. بعدها الـ workspace بيتمسح، وقدامك 90 يوم تنزّل الـ workflows وتنقلها لباقة أو لسيرفرك.
إيه اللي بيحصل لو الـ executions خلصت على Starter؟
أي تشغيلة جديدة بتفشل لحد أول الشهر الميلادي الجاي، أو لحد ما ترقّي. مفيش حاجة بتتأجل وتتنفذ بعدين.
لو عملت workflow فيه 20 node، ده بيتحسب كام execution؟
execution واحد في كل مرة الـ workflow يشتغل فيها، مش كل خطوة.
أقل سيرفر يشغّل n8n قد إيه؟
توثيق n8n بيقول إن instance فاضي بياخد حوالي 100 MB، والباقي على حسب الـ workflows والبيانات. عملياً ابدأ بـ 2 GB عشان يبقى فيه مساحة لقاعدة البيانات والـ workflows التقيلة.
