عمل بوت تليجرام n8n بيرد على أسئلة عملائك من شيت انت اللي بتحدّثه هو أسهل مشروع AI Automation حقيقي تبدأ بيه. Telegram مش محتاج موافقة من أي حد، والبوت مجاني، وفي أقل من ساعة يبقى عندك بوت بيرد على "عندكم مقاس 42؟" و"السعر كام؟" من بياناتك انت، ولما المعلومة مش موجودة بيقول إنه مش عارف بدل ما يألّف.
ده بالظبط موضوع أول ورشة n8n مجانية بعملها. لو حابب تبني البوت ده معايا لايف، الرابط في آخر المقال.
المحتوى
- الفكرة في سطرين
- 1. اعمل البوت من BotFather
- 2. جهّز الشيت
- 3. خطوات عمل بوت تليجرام n8n
- 4. جرّب واكسره قبل ما عملاءك يكسروه
- أسئلة شائعة
الفكرة في سطرين
العميل بيبعت سؤال للبوت. n8n بيستقبله، يدّيه لـ AI Agent معاه أداة واحدة: يقرا الشيت. الـ Agent بيدوّر، يكتب رد قصير بالعامية، و n8n يبعته للعميل.
Telegram Trigger → AI Agent (+ Gemini + Memory + Google Sheets) → Telegram: Send Message
هتحتاج: حساب Telegram، حساب Google، و n8n. لو لسه معندكش، تجربة n8n Cloud المجانية كفاية للمقال ده. ولو n8n جديد عليك خالص، ابدأ بـ شرح ai automation.
1. اعمل البوت من BotFather
- افتح محادثة مع @BotFather على Telegram.
- ابعت
/newbot. - هيسألك عن اسم البوت، ده اللي بيظهر للناس وتقدر تغيّره بعدين. مثلاً "محل الأمل للأحذية".
- وبعدها عن username. ده ليه شروط: من 5 لـ 32 حرف، حروف لاتيني وأرقام و underscore بس، ولازم يخلص بـ
bot، زيalamal_shoes_bot. ومش هتقدر تغيّره بعدين. - BotFather هيبعتلك توكن. ده مفتاح البوت، أي حد معاه يقدر يتحكم فيه، فمتحطّوش في أي مكان عام.
2. جهّز الشيت
اعمل Google Sheet جديد بالأعمدة دي، وصفوف حقيقية من محلّك:
| المنتج | السعر | متاح | ملاحظات |
|---|---|---|---|
| كوتشي جري رجالي | 1,450 ج.م | نعم | مقاسات 40 لـ 45 |
| صندل حريمي جلد | 890 ج.م | لا | يرجع أول الشهر |
| شنطة ظهر مدرسية | 650 ج.م | نعم | لونين: كحلي وأسود |
خلّي أسماء الأعمدة بسيطة وواضحة، لأن الـ AI بيقراها زي ما هي. عمود "ملاحظات" مفيد جداً: أي معلومة مش لاقي لها مكان حطّها فيه.
3. خطوات عمل بوت تليجرام n8n
الـ credential
في n8n اعمل credential من نوع Telegram API، وحط التوكن في خانة Access Token.
Telegram Trigger
ضيف Telegram Trigger، اختار الـ credential، وفي Updates اختار Message.
وانت بتجرّب، استخدم الـ option اسمه Restrict to Chat IDs وحط فيه الـ chat ID بتاعك، عشان محدش تاني يلعب في البوت قبل ما يخلص.
حاجتين من docs n8n لازم تعرفهم:
- Telegram بيقبل webhook واحد بس لكل بوت. لو الـ workflow منشور وانت بتجرّب بالـ Test URL، واحد فيهم بس هيستقبل. يا إما تعمل Unpublish وانت بتجرّب، يا إما تعمل بوت تاني للتجربة من BotFather.
- لو n8n على سيرفرك، Telegram محتاج رابط HTTPS. غير كده هتشوف الخطأ bad webhook: An HTTPS URL must be provided for webhook. الحل في دليل تثبيت n8n على VPS.
AI Agent
ضيف AI Agent بعد الـ Trigger.
في Prompt اختار Define below، وحط رسالة العميل:
{{ $json.message.text }}
وفي System Message حط القواعد. دي أهم خطوة في المشروع كله:
انت مساعد محل الأمل للأحذية في المنصورة على Telegram.
رد بالعامية المصرية، في سطرين أو تلاتة بالكتير.
عندك أداة اسمها "المنتجات" فيها كل المنتجات والأسعار والتوفر.
دوّر في الأداة قبل ما ترد على أي سؤال عن منتج أو سعر أو توفر.
لو المنتج مش موجود في الأداة، أو المعلومة مش مكتوبة، قول:
"مش لاقي المعلومة دي عندي، هخلّي حد من المحل يرد عليك."
متقولش أي سعر أو معلومة من عندك أبداً.
لو المنتج "متاح" = لا، قول إنه مش متوفر حالياً واذكر الملاحظات.
السطر اللي بيقول "متقولش أي سعر من عندك" هو اللي بيفرّق بين بوت تثق فيه وبوت بيقول لعميل إن الكوتشي بـ 300 جنيه. الموديلات بتحب تكمّل الإجابة حتى لو مش عارفة، والتعليمات الصريحة بتقلل ده جداً.
الموديل والذاكرة والأداة
تحت الـ AI Agent هتلاقي ثلاث خانات توصّل فيهم:
Chat Model: اختار Google Gemini Chat Model، واعمل credential بـ API key من Google AI Studio. أي موديل Flash رخيص كفاية للمشروع ده.
Memory: اختار Simple Memory عشان البوت يفتكر اللي العميل قاله من شوية ("طب وفي مقاس 43؟"). في Session Key حط الـ chat ID عشان كل عميل ليه ذاكرته:
{{ $('Telegram Trigger').item.json.message.chat.id }}
و Context Window Length سيبه رقم صغير زي 5. ملحوظة: Simple Memory مناسبة للتجربة. للإنتاج بخزّن المحادثة في قاعدة بيانات، وده موضوع مقال تاني.
Tool: اختار Google Sheets، اعمل credential بحساب Google، واختار العملية Get Row(s) والشيت بتاعك. غيّر اسم الأداة لـ "المنتجات"، وفي الوصف اكتب: "بترجع كل المنتجات بالسعر والتوفر والملاحظات". الـ Agent بيقرا الوصف ده عشان يعرف إمتى يستخدمها.
Telegram: Send Message
آخر نود Telegram بالعملية Send Message:
- Chat ID: {{ $('Telegram Trigger').item.json.message.chat.id }}
- Text: {{ $json.output }}
- من Additional Fields ضيف Append n8n Attribution واقفله. غير كده كل رد هيخلص بجملة "This message was sent automatically with n8n".
اعمل Publish وابعت للبوت "عندكم كوتشي جري؟".
4. جرّب واكسره قبل ما عملاءك يكسروه
قبل ما تدّي اللينك لأي عميل، جرّب الحاجات دي بنفسك:
- اسأل عن منتج موجود ومتاح. لازم يرد بالسعر الصح من الشيت.
- اسأل عن منتج مش في الشيت خالص، زي "عندكم جزم أطفال؟". لازم يقول الجملة بتاعة "مش لاقي المعلومة دي".
- اسأل عن الصندل اللي "متاح" قدامه لا.
- غيّر سعر في الشيت واسأل تاني. الرد لازم يتغيّر من غير ما تلمس n8n.
- ابعت صورة أو sticker.
message.textهيبقى فاضي، فضيف نود IF بعد الـ Trigger يعدّي بس الرسايل اللي فيها نص، ويرد على الباقي بجملة ثابتة. - اسأل بالإنجليزي وبالعامية وبأخطاء إملائية.
لو حاجة من دول فشلت، الحل غالباً في الـ System Message أو في أسماء الأعمدة، ونادراً في n8n نفسه.
لما البوت يعدّي الاختبارات دي، نفس الـ Agent ونفس الشيت ينفع يتنقلوا لواتساب. الفرق إن الاستقبال والإرسال بيكونوا من الـ WhatsApp Cloud API، والخطوات في شرح عمل شات بوت واتساب n8n.
أسئلة شائعة
هل بوت Telegram مجاني؟
البوت نفسه مجاني، و Telegram بيقول إن البوتات تقدر تبعت لمستخدميها من غير تكلفة، في حدود 30 رسالة في الثانية للإذاعة. اللي بتدفعه هو الـ AI (مع موديل Flash-Lite أقل من دولار لكل كام مية سؤال، والحسبة بالتفصيل في تكلفة شات بوت واتساب) و n8n لو مش على الخطة المجانية أو التجربة.
البوت يقدر يبعت للعميل الأول؟
لأ. العميل لازم يفتح البوت ويضغط Start الأول. بعدها البوت يقدر يرد ويبعت له.
ليه البوت بيقول أسعار غلط؟
غالباً الـ Agent مش بيستخدم الأداة وبيرد من دماغه. راجع إن الـ System Message بيقوله صراحة يدوّر في الأداة قبل ما يرد، وإن وصف الأداة واضح. وافتح الـ execution وشوف هل الأداة اتنادت فعلاً.
أقدر أستخدم OpenAI بدل Gemini؟
أيوه. غيّر نود الـ Chat Model لـ OpenAI Chat Model وحط الـ API key بتاعك. باقي الـ workflow زي ما هو.
أعمل بوت تليجرام n8n لو الشيت فيه مئات المنتجات؟
Get Row(s) بيرجع الشيت كله، وده بيكبّر الـ tokens والتكلفة مع كل سؤال. لحد كام مية صف غالباً مقبول. أكتر من كده، خلّي الأداة تفلتر بالاسم، أو استخدم RAG.
في الورشة المجانية بنبني البوت ده سوا من الصفر في 90 دقيقة، وبتخرج منها والبوت شغّال على حسابك وملف الـ workflow معاك.
