مقارنة n8n vs Make vs Zapier من أكتر الأسئلة اللي بتوصلني من الطلبة وأصحاب الشركات الصغيرة. التلات أدوات بيعملوا نفس الفكرة: حدث يحصل في مكان، فتتنفّذ خطوات في أماكن تانية من غير ما حد يدخل بإيده. الفرق الحقيقي في تلات حاجات: إزاي كل أداة بتعدّ استخدامك وتحاسبك عليه، هل تقدر تشغّلها على سيرفرك، ومحتاجة منك قد إيه خبرة تقنية.
أنا بدرّس n8n في الدبلومة وبستخدمه في شغلي، فخلّي في بالك إن عندي انحياز. هحاول أعوّضه بالأرقام من صفحات الأسعار نفسها، وأقولك إمتى Make أو Zapier يبقوا أحسن لك.
المحتوى
- مقارنة n8n و Make و Zapier بالأسعار
- كل أداة بتعدّ إيه؟ task و credit و execution
- الـ self-hosting
- مميزات الـ AI
- الدفع من مصر والخليج
- n8n vs Make vs Zapier: تختار مين؟
- أسئلة شائعة
مقارنة n8n و Make و Zapier بالأسعار (سبتمبر 2026)
الأسعار دي من صفحات الشركات التلاتة يوم كتابة المقال. بتتغيّر كل كام شهر، فراجع الصفحة قبل ما تدفع.
| Zapier | Make | n8n Cloud | n8n على سيرفرك | |
|---|---|---|---|---|
| مجاني | 100 task في الشهر، Zaps من خطوتين بس | 1,000 credit في الشهر، أقل فاصل تشغيل 15 دقيقة | تجربة 14 يوم | Community مجانية من غير حد executions |
| أول باقة مدفوعة | Professional: $19.99 / شهر سنوي، $29.99 شهري، على 750 task | Core: $9 / شهر، 10,000 credit | Starter: 20 يورو / شهر سنوي، حوالي 24 شهري، 2,500 execution | تمن السيرفر بس، حوالي $6 إلى $12 على DigitalOcean |
| العملة | دولار | دولار | يورو | دولار للسيرفر |
بالجنيه، على 52 ج.م للدولار و 59 للّيورو: Zapier Professional بين 1,040 و 1,560 ج.م في الشهر، Make Core حوالي 470 ج.م، و n8n Starter بين 1,180 و 1,420 ج.م. بالريال، Zapier Professional حوالي 75 ر.س في الشهر على الدفع السنوي، و Make Core حوالي 34 ر.س.
الجدول ده لوحده بيضلّل، لأن 750 task في Zapier مش زي 10,000 credit في Make ولا زي 2,500 execution في n8n. لازم تعرف كل واحد بيعدّ إيه.
كل أداة بتعدّ إيه؟ task و credit و execution
خد مثال واحد: عميل بيملى فورم طلب على موقع صيدلية في إسكندرية. الأوتوميشن بيعمل 4 خطوات: يقرا الطلب، يضيفه صف في Google Sheets، يبعت إيميل تأكيد للعميل، ويبعت رسالة Telegram للصيدلي.
Zapier بيحسب task على كل خطوة اتنفّذت بنجاح. الـ trigger مش بيتحسب، والخطوات اللي فشلت مش بتتحسب، وأدوات زي Formatter مجانية. يعني الطلب ده بياخد حوالي 3 tasks. 750 task في الشهر تكفّي حوالي 250 طلب. لو عديت الحد وكنت مفعّل pay-per-task، الشغل بيكمّل والزيادة بتتحاسب بسعر أعلى من سعر الباقة.
Make غيّر وحدة الحساب لـ credit. كل module بينفّذ action بياخد credit في الغالب، وبعض مميزات الـ AI بتاخد أكتر. نفس الطلب حوالي 3 إلى 4 credits، و 10,000 credit تكفّي أكتر من 2,000 طلب.
n8n بيحسب execution على كل تشغيلة كاملة للـ workflow، مهما كان فيها خطوات. الطلب ده execution واحد، و 2,500 execution تكفّي 2,500 طلب. ولو بكرة زوّدت 10 خطوات كمان، لسه execution واحد.
الخلاصة العملية: لو الـ workflow بتاعك قصير وقليل التشغيل، الفرق صغير. لو طويل (AI، شروط، loops على صفوف كتير)، Zapier و Make بيغلوا بسرعة و n8n بيفضل ثابت.
الـ self-hosting
هنا n8n لوحده. Zapier و Make خدمات سحابية بس، مفيش نسخة تنزّلها على سيرفرك. صفحة Make بتقول إن الاستضافة على AWS في أوروبا أو أمريكا الشمالية.
n8n عنده نسخة Community مجانية تركّبها على VPS أو على سيرفر جوا الشركة، والبيانات ماتخرجش برا. ده بيفرق جداً مع مستشفى أو أي شركة في السعودية عندها سياسة بتقول البيانات تفضل جوا الشركة. الترخيص بيسمح تستخدمه في شغل شركتك وتبني workflows لعملاء وتاخد أجر ده، والممنوع إنك تستضيفه وتبيع للناس إنهم يبنوا عليه. التفاصيل في مقال هل n8n مجاني؟.
التمن: السيرفر مسؤوليتك. التحديثات، النسخ الاحتياطي، والأمان. لو ده مش مناسب لك، n8n Cloud موجود.
مميزات الـ AI
التلاتة دخلوا الـ AI بقوة، بس بشكل مختلف:
- n8n فيه AI Agent node، وموديلات كتير (OpenAI، Gemini، Claude، وموديلات محلية)، وذاكرة، وأدوات يستخدمها الـ agent، و RAG بـ vector stores. تقدر تحط الـ API key بتاعك وتدفع للمزوّد مباشرة، ولو على n8n Cloud (Starter أو Pro) تقدر كمان تستخدم Gateway credits من غير حساب عند المزوّد.
- Make عنده Make AI Agents (لسه beta)، وبتقدر تستخدم مزوّد AI بتاع Make أو الـ key بتاعك.
- Zapier عنده Copilot يساعدك تبني الـ Zap، و Zapier Agents بحساب منفصل عن الـ tasks.
لو شغلك الأساسي AI Agents فيها منطق ومراحل، n8n أمرن. لو عايز تحط خطوة "لخّص الإيميل ده" وسط Zap بسيط، Zapier و Make بيعملوها كويس.
الدفع من مصر والخليج
التلات أدوات بيتدفعوا بالكارت بعملة أجنبية: Zapier و Make بالدولار، و n8n Cloud باليورو. في الخليج الموضوع سهل غالباً. في مصر، كروت كتير عليها حد شهري للمشتريات بالعملة الأجنبية، وبعض البنوك بتزوّد مصاريف تحويل. اسأل بنكك قبل ما تبني حاجة لعميل على اشتراك ممكن يقف لو الكارت اترفض.
n8n على سيرفرك بيقلّل المشكلة دي: الفاتورة الشهرية الوحيدة بتبقى فاتورة السيرفر، وهي أصغر.
n8n vs Make vs Zapier: تختار مين؟
اختار Zapier لو إنت مش تقني، والأوتوميشن بتاعك قصير (خطوتين أو تلاتة)، ومحتاج تطبيق لقيته جاهز عنده. Zapier أسهل الأدوات التلاتة في البداية. هو كمان الأغلى لما الشغل يكبر.
اختار Make لو عايز واجهة مرئية وسعر أقل من Zapier، ومش محتاج تركّب حاجة على سيرفر. مناسب لسيناريوهات متوسطة التعقيد في شركة صغيرة، زي مكتب عقارات في الرياض بيربط الفورم بالـ CRM والإيميل.
اختار n8n لو فيه عندك AI Agents، أو workflows طويلة بتشتغل كتير، أو بيانات لازم تفضل عندك، أو عايز تبيع أوتوميشن لعملاء كفريلانسر. منحنى التعلّم أعلى شوية، لأنك هتتعامل مع JSON و APIs و expressions. ودي بالظبط المهارة اللي بتفرق في سوق الشغل.
لو بتدوّر على بديل Zapier أرخص، Make أقرب خطوة. لو عايز بديل Zapier تتحكم فيه بالكامل، n8n.
أنا بدرّس n8n لأنه اللي بتقدر تتعلمه مرة وتشغّله في أي مكان، على Cloud أو على سيرفر أي عميل. لو عايز تفهم الأساسيات الأول، ابدأ بمقال يعني إيه AI Automation، أو احضر ورشة n8n المجانية وشوفني ببني workflow من الصفر.
ولو قررت تتعلمه بجد، دبلومة AI Automation العملية 25 محاضرة لايف (75 ساعة) فيها lab في كل محاضرة، وحالياً بدرّس فيها 44 محترف من مصر والسعودية مع EYouth. سعر الدفعة الأولى 6,500 ج.م، أو $249 لو بتدفع من برا مصر.
أسئلة شائعة
أنهي أرخص: n8n ولا Make ولا Zapier؟
للاستخدام الخفيف، Make غالباً الأرخص في السحابة. للـ workflows الطويلة أو الكتيرة، n8n أرخص لأنه بيحسب التشغيلة كلها مرة واحدة، ولو على سيرفرك بتدفع تمن السيرفر بس.
هل n8n أصعب من Zapier؟
أيوه في البداية. هتحتاج تفهم JSON والـ expressions. بعد أول أسبوعين بيبقى أسرع لأي حاجة فيها منطق.
ينفع أنقل Zaps من Zapier لـ n8n أوتوماتيك؟
الطريقة اللي بنصح بيها إنك تعيد بناءها في n8n خطوة خطوة، وغالباً بتطلع أقصر لأن خطوات كتير بتتجمع في node واحد.
أنهي أحسن للـ AI Agents؟
n8n، لأنه فيه AI Agent node وذاكرة وأدوات و RAG، وبتختار الموديل اللي يناسبك.